previous arrow
next arrow
Slider

Parke di tráfiko pa eduká i rekreá

Parke di tráfiko tin un karakter edukativo i tambe rekreativo. Parke di tráfiko ta habri henter aña i tur dia pa aktividatnan privá. Parke di tráfiko ta habrí tur vakansi di skol ku eksepshon di desèmber pa públiko.
Parke di tráfiko ta haña bishita tur mainta di alumnonan di grupo 7. Tur skol di fundeshi ta haña lès di tráfiko den grupo 7 na skol i 2 bia pa aña nan ta bishita Parke di Tráfiko pa nan práktika loke nan ta haña na skol. Na total Parke di tráfiko ta haña bishita di 62 skol, kual ta ensera e skolnan basiko, LOM, MLK i tambe ZMLK. E bishita ta kedá konsiderá komo un dia nòrmal di skol.

Praktiká kon pa apliká reglanan di tráfiko

Den kordinashon ku ABC Busbedrijf i ku ayudo di ministerio di enseñasa, tur alumno ta wòrdú buska na skol ku konvoi di ABC i tresé na Parke di Tráfiko i vise vèrsa. E alumnonan di MLK i ZMLK ta haña solamente lèsnan práktiko, mientras tantu e alumnonan di skol básiko ta haña e parti práktiko i tambe teorétiko. E parti práktiko ta wòrdú hasi den e parke di tráfiko mes i e parti teorétiko ta wòrdú duná den lèslokal.
Parke di Tráfiko tin un tim ku eksperensia ta instruí tur alumno kon pa apliká e reglanan di tráfiko, usando skèlternan ku Parke di Tráfiko tin na su disposishon. E lès práktiko tin un durashon di 1 hora i 30 minüt.

Enfasis riba konsientisashon

 

Durante añanan e parti teorétiko tabata keda duná dor di nos instruktornan den e lèslokal. Poko poko esaki a kedá kambiá i modernisá. E tim di Parke di Tráfiko átrabes di tempu tabata haña ku ta muchu mas importante guiá e alumnonan pa nan bira mas konsiente den tráfiko dor di laga nan wak video di tráfiko i kiko por ta e konsekuensia di no ta responsabel den tráfiko. Despues ku e alumnonan kaba di wak e video ta parti e alumnonan den grupo i nan tin ku interkambiá ku otro i presentá loke tur nan diskutí

Historia Parke di Tráfiko:

Na aña 1965 Shell Curaçao ta regalá pueblo di Kòrsou un Parke di Tráfiko. ATSK/VVV ta keda responsabel pa mantenshon i manehó di e parke. Shell Curaçao ta duna e tempu ey tambe un kantidat di outo di pedal i baiskel. Di forma aki ta habri kaminda pa risibí tur alumnonan di grupo 7 (antes klas 5) pa práktika reglanan di tráfiko. Te awe tur skol básiko i skol spesial ta bishitá Parke di Tráfiko 2 t’é 3 bia pa aña. Un total di 62 skol ta bin parke di tráfiko.

Durante di un aña eskolar, Parke di Tráfiko ta risibí bishita tambe di skolnan preparatorio.
Banda di e parti edukativo, Parke di Tráfiko ta hopi gusta tambe pa e parti rekreativo. E parke tin posibilidat pa hasi aktividat, manera fiesta, dia di famia, dia deportivo, feria i hopi mas.

Pa reservá klek aki.

Un parke di tráfiko den e konteksto aki ta úniko den Káribe.

Historia Asosashon Tráfiko Sigur Kòrsou:

27 òktober ta fundá Vereniging voor Veilig Verkeer op Curaçao, VVV-C. E promé presidènt tabata señor H.J. Nederhorst, kende huntu ku señornan A. van Meeteren, J. Herweijer, P. Paul i M. Henriquez a forma e promé direktiva di VVV, ku na aña 1997 a tradusí e na papiamentu; Asosashon Tráfiko Sigur Kòrsou (ATSK).

Segun añanan a transkurí e kantidat di outo na Kòrsou a oumentá. Mester a traha i amplia kamindanan. Aksidentenan ya no tabata okashonalmente. Tráfiko tabata hopi insigur. Ta na e momento aki e pèrsonanan ariba menshoná a ripará ku a yega e momento pa kuminsá informá i alerta pueblo riba seguridat den tráfiko.

lesa mas

Introdukshon di Presidente

 

Bo por nota sivilidat di un pueblo den komportashon den tráfiko di su hendenan. E base pa un bon komportashon den tráfiko ta kuminsá for di edukashon na kas, sigui pa esun den bario i tambe na skol. Si mayor i adultonan duna e bon ehèmpel i komportashon nesesario, outomátikamente esnan ku ta lantando ta heredá tur e bondatnan so.

Konsekuensha lo ta ku e bon komportashonnan aki sin duda tin su refleho tambe den nos tráfiko. Kampañan di konsientisashon den tráfiko, spòtnan den diferente medianan di komunikashon i poné riba retnan sosial di e diferente klupnan di servisio,asosashon i fundashonnan, kombiná ku anális di sifranan di tráfiko lo sirbi e ora ei solamente pa duna un kontribushon i pa hasi planifikashon den futuro pa nos tráfiko bira aun mas sigur.

Ku e mensahe aki, siendo Presidente di Asosashon Tráfiko sigur Kòrsou, ta spera ku nos tur di awe bai dilanit lo bai hasi nos máksimo esfuerso pa demostrá ku enberdat nos ta un pais ku un sentido haltu di sivilisashon.